سچ جب اظہر من الشمس ہو تا ہے

بیرسٹر حمید باشانی

ہر سچ کو تین مراحل سے گزرنا ہوتا ہے۔ پہلے مرحلے پر اس کا مذاق اڑیا جاتا ہے۔ دوسرے مرحلے پر اس کی پر تشدد مخالفت کی جاتی ہے۔ اور اسے تیسرے مرحلے پر اسے اظہر من الشمس سمجھ کر تسلیم کر لیا جاتا ہے۔ جرمن فلسفی آرتھر شاپن ہاور کے اس قول کے عین مطابق پاک فوج کے شعبہ تعلقات عامہ کے دائریکٹر کا سچ بھی کچھ ان ہی مراحل سے گزر کر ہم تک پہنچا ہے۔ فوج کے ترجمان نے جو کہا اس میں کئی لوگوں کے لیے حیرت کا سامان تھا۔ یہ سچائی کا اعتراف تھا۔

پریس کانفرنس کا ایک اہم نقطہ یہ تھا کہ اگر سال1971میں ذرائع ابلاغ آج کی طرح آزاد ہوتے تو بنگلہ دیش نہ بنتا۔ ذرائع ابلاغ کی آزادی کو تسلیم کرنے سے مراد پاکستان کے عوام کے ایک بنیادی انسانی حق یعنی آزادی اظہار رائے کو تسلیم کرنا ہے۔ ظاہر ہے آزادی اظہار رائے سے مراد یہ ہے کہ ہر شہری کو اپنا مافی الضمیر بلا خوف و خطر بیان کرنے کا حق ہے۔ مافی الضمیر کا یہ اظہار کسی بھی پیرائے میں ہو سکتا ہے۔ خواہ یہ اظہار تحریر و تقریر کی شکل میں ہویا کسی اور فنکارانہ پیرائے میں ہو۔ اور ظاہر ہے یہ اظہار ذرائع ابلاغ کے ذریعے ہی عوام تک پہنچ سکتا ہے۔

چنانچہ اگر ذرائع ابلاغ آزاد نہیں ہیں تو وہ خیالات اور حقائق کو عوام تک پہنچانے میں ناکام رہتے ہیں۔ ترجمان نے تسلیم کیا کہ اگر زرائع ابلاغ آزاد ہوتے تو ایسا نہ ہوتا۔ اس بات کو دوسرے الفاظ میں یوں بھی پیش کیا جا سکتا ہے کہ اگر پاکستان کے شہریوں کو بنیادی انسانی حقوق حاصل ہوتے تو آج پاکستان کی تاریخ مختلف ہوتی۔

ہم جانتے ہیں کہ جہاں ذرائع ابلاغ آزاد ہوتے ہیں، اور جہاں بات کہنے سننے کا کلچر ہوتا ہے، وہاںایک آزاد اور روادار سماج ہوتا ہے۔ ایسے سماج میں کسی ایک شخص، گروہ، ادارے یا طبقے کی اجارہ داری نہیں ہوتی۔ چنانچہ ایسے سماج میں دھونس، دھندلی اور جبر کی گنجائش کم ہوتی ہے۔ ایسے سماج میں ظلم و انصافی کا شکار ہونے والوں کے لیے دادرسی اور انصاف کے دروازے بند نہیں ہوتے۔ لاٹھی اورگولی کی سرکار نہیں چلتی۔ اختلاف رائے رکھنے والوں کے درمیان مکالمہ ہوتا ہے، اور انسانی مسائل ، اور مشکلات کا حل نکالا جاتا ہے۔

اس طرح کے کھلے اور روا دار معاشرے میں کوئی ایک قوم، قومیت، طبقہ یا گروہ اپنے آپ کو مجبوراور محصور نہیں سمجھتا۔ اس طرح کے سماج میں اگر کسی انسان کو کوئی شکوہ بھی ہے تو اسے بندوق اٹھانے کی ضرورت نہیں پڑتی۔ وہ اپنے حق اور عزت نفس کے تحفظ کے لیے قانونی اور جمہوری راستے اختیار کرسکتا ہے۔ ایسے سماج کے اندر خانہ جنگی کے امکانات نہیں ہوتے۔ اور ایسے جمہوری اور انصاف پر مبنی معاشرے میں جنگ و جدل اور فوج کشی کی ضرورت نہیں پڑتی۔ چنانچہ اظہار رائے کی آزادی کے ساتھ کئی دوسرے بنیادی حقوق اور شہری آزادیاں جڑی ہوتی ہیں۔

اگر اظہار رائے کا احترام کیا جاتاتو شائد سیاسی ، معاشی اور لسانی حقوق کا ایک تنازعہ جسے جمہوری طریقے سے طے کیا جا سکتا تھا اتنی سنگین شکل نہ اختیار کرتا۔ مگر اظہار رائے پر پابندی محض ستر کی دھائی کا المیہ نہیں تھا۔ بد قسمتی سے عوام کے حقوق پر پابندیوں کا سلسلہ تاریخی طور پر روز اول سے یعنی قیام پاکستان کے فورا بعد شروع ہو گیا تھا۔ ملک کی سول و فوجی نوکر شاہی اور ہییت مقتدرہ میں کئی ایسے لوگ موجود تھے ، جو اس سے پہلے انگریزی راج کے زیر اثر کام کر چکے تھے۔

انگریز سرکار کا ہندوستان پر حکومت کرنے کا ایک خاص طریقہ تھا، جو خود انگلستان اور دوسرے مغربی ممالک میں حکومت کرنے کے طریقوں سے یکسر مختلف تھا۔ حکومت کا یہ طریقہ خاص طور پرایک نو آبادی کا انتظام و انصرام چلانے کے لیے ترتیب دیاگیا تھا، جس میں لوگوں کو تمام بنیادی حقوق یا شہری آزادیاں حاصل نہ تھیں، اگر تھیں بھی تو انتہائی محدود اور مشرط تھیں۔ یہ طریقہ کار کسی آزاد ملک کو چلانے کے لیے نا مناسب تھا۔ مگر بد قسمتی سے آزادی کے فورا بعد جو عملی اقدامات شروع ہوئے، وہ عوام سے کے گئے وعدوں اور ان کو دیکھائے گئے خوابوں سے یکسر مختلف تھے۔ نو آبادیاتی تجربے اور نفسیات کے حامل لوگوں نے قیام پاکستان کے فورا بعد فیصلہ سازی کا اختیار حاصل کر لیااور ان لوگوں نے اپنی نفسیات اور افتاد طبع کے مطابق فیصلے کرنے شروع کر دئیے ۔

پاکستان میں خواہ کوئی سول حکومت ہو یا فوجی، ان لوگوں نے فیصلہ سازی کے میز پر کسی نہ کسی شکل میں اپنی جگہ گھیرے رکھی۔ ان کا ہمیشہ یہ خیال رہا کہ اس ملک کے اصل وارث اور محافظ بس وہ ہی ہیں۔ چنانچہ جو کچھ وہ سوچتے ہیں وہی سچ ہے۔ ان لوگوں کی اس سوچ اور عمل کا آغاز قیام پاکستان کے فورا بعد ہو گیا تھا۔ اظہار رائے کے باب میں ان لوگوں نے پہلا حملہ خود بانی پاکستان قائد اعظم محمد علی جناح پر کیا۔ قائد اعظم کا یہ اعلان کہ پاکستان میں ہر شہری برابر ہو گا ، اور اقلیتوں کو اپنے عقائد کے مطابق زندگی گزارنے کی آزادی ہوگی ان لوگوں کو پسند نہیں آیا۔ چنانچہ انہوں نے پریس اڈوائس جاری کی کہ قائد اعظم کی یہ تقریر سنسر کی جائے۔ اس وقت کے روز نامہ ڈان کے ایڈیٹر الطاف حسین نے یہ احکامات ماننے سے انکار کردیا اور اصرار پر معاملہ قائد اعظم کے پاس لے جانے کی دھمکی دی۔ اس واقعے کی تفصیل ضمیر نیازی کی کتاب، پریس ان چین ِ ، میں موجود ہے۔

قائد اعظم کے بعد محترمہ فاطمہ جناح ان لوگوںکی خود ساختہ سچائی اور ملکی مفاد کا نشانہ نتنی رہی۔ قائد اعظم کی وفات کے بعد دو سال تک وہ ان کی برسی پر تقریر نہ کر سکیں۔ اس کی وجہ یہ تھی کہ ان سے کہا گیا کہ وہ اپنی تقریر پہلے لکھ کر جمع کروائیں ۔ دو سال بعد جب وہ تقریر لکھ کر جمع کرانے پر رضامند ہوئیں، تو ان سے تقریر کے کچھ حصے حذف کرنے کے لیے کہا گیا، انہوں نے ایسا نہیں کیا۔ مگر جب یہ تقریر ریڈیو پاکستان سے نشر ہوئی تو ان کی منشا کے بر عکس ان حصوں کو حذف کر لیاگیا تھا۔

بعد میں ریڈیو پاکستان کے زیڈ۔اے بخاری نے مس جناح کے نام ایک خط میں اس پر معذرت کی اور کہا کہ ایسا ٹیکنیکل خرابی کی وجہ سے ہو گیا تھا۔ فاطمہ جناح نے جواب میں لکھا کہ انہیں اس بات پر حیرت ہوئی کہ تقریر کے جن حصوں کو حذف کرنے کے لیے کہا گیاتھا ، وہی ٹیکنیکل خرابی کاشکار ہوئے۔ جو لوگ قائد اعظم اور فاطمہ جناح کی تقریریوں کو سنسر کر سکتے تھے ان کے مائنڈ سیٹ کا اندازہ لگانا چنداں دشوار نہیں۔ اس مائنڈ سیٹ کا اظہار تاریخ میں تسلسل کے ساتھ ہوتا رہا ہے۔

اکتوبر 1948میں جو پبلک سیفٹی آرڈیننس جاری کیا گیا اس کو قائد اعظم پہلے ہی مسترد کر چکے تھے۔ اس آرڈیننس کا مسودہ جب قائد اعظم کے سامنے پیش کیا گیا تو انہوں نے یہ کہہ کر اسے مسترد کر دیا کہ جن کالے قوانین کے خلاف میں ساری زندگی لڑتا رہا ہوں اس پر کیسے دستخط کر سکتا ہوں۔ یہ قانون جس سے پریس پر پابندیوں کا غلط آغاز ہوا بعد میں انیس سو باون میں سیفٹی ایکٹ کے نام سے باقاعدہ قانون ساز اسمبلی سے منظور کروا لیا گیا۔ اس پبلک سیفٹی آرڈینس کے تحت ہفت روزہ سویرا کو 1948میں بند کر دیا گیا، اس کے بعد لاہور سے شائع ہونے والے نقش اور ادب لطیف پر پابندی لگی۔

سال۱۹۵۰میں سویراکے ایڈیٹر ظہیر کاشمیری کو بغیر مقدمے کے جیل میں بند کر دیا گیا۔ یہ سلسلہ سعادت حسین منٹو اور فیض احمد فیض سے ہوتا ہوا کٗئی دوسرے صحافیوں تک پہنچا۔ 1960ا ایوب خان کا پریس آرڈیننس اور1963کا صوبائی پریس آرڈیننس پریس کے تابوت میں آخری کیل تھا، چنانچہ جب بنگلہ دیش میں بے چینی شروع ہوئی تو میدان میں صرف وہ اخبارات رہ گئے تھے، جو حکومت کے ہر عمل کی توصیف اپنا بنیادی فرض سمجھتے تھے۔

چنانچہ یہ بات دررست تسلیم کی گئی ہے کہ بنگلہ دیش کے قیام کی ایک وجہ وجہ اظہار رائے پر پابندی بھی تھی۔

Leave a Reply

Your email address will not be published. Required fields are marked *