میرے بیٹوں کا باپ پاکستان کا اگلا وزیر اعظم

اب تک کے نتائج کے مطابق پاکستان تحریک انصاف قومی اسمبلی کی سب سے زیادہ نشستیں حاصل کرنے میں کامیاب رہی ہے اور عمران خان کے وزیراعظم بننے کا خواب پورا ہی ہوا چاہتا ہے۔

عمران خان کی سابق اہلیہ جمائما گولڈ سمتھ نے اپنے ٹوئٹر اکاؤنٹ پر عمران خان کو ملک کا اگلا وزیر اعظم قرار دے دیا ہے۔ انہوں نے پاکستانیوں کو بھی مبارک باد دی۔

جمائما گولڈ سمتھ پاکستان تحریک انصاف کے چیئرمین عمران خان کی پہلی  بیوی ہیں۔ کہا جاتا ہے کہ طلاق کے باوجود جمائما گولڈ سمتھ اور عمران خان کے درمیان دوستانہ رشتہ ہے۔ انہوں نے انتخابی مہم میں بھی کئی مرتبہ عمران خان کے حق میں ٹوئٹس  کیں اور عمران خان کے خلاف عدالتی کیس میں بھی اپنے سابق شوہر کے ساتھ تعاون کیا تھا۔

اب تک کے انتخابی نتائج کے مطابق پاکستان تحریک انصاف قومی اسمبلی کی نشستوں کے اعتبار سے دیگر جماعتوں سے آگے ہے اور عین ممکن ہے کہ وہ پاکستان کی اگلی حکومت قائم کرے۔ ان ابتدائی نتائج کے بعد جمائما گولڈسمتھ نے اپنے ٹوئٹر اکاؤنٹ پر لکھا، ’’بائیس سال بعد، کئی شرمندگیوں، مشکلات اور قربانیوں کے بعد میرے بیٹوں کا باپ پاکستان کا اگلا وزیر اعظم ہے۔ یہ ناکامی کو تسلیم کرنے، عقیدے اور استقامت کی اعلیٰ مثال ہے۔‘‘ جمائما نے اپنی ٹویٹ میں بھی لکھا کہ اب عمران خان کے لیے چیلنج یہ ہے کہ وہ یہ یاد رکھیں کہ آخر وہ سیاست میں آئے کیوں تھے۔

عمران خان نے جمائما سے علیحدگی کے ایک طویل عرصے بعد  ریحام خان سے سن 2014 میں شادی کی تھی۔ ریحام خان سے ان کی شادی صرف نو ماہ تک ہی قائم رہی۔ ریحام  سے علیحدگی کے بعد کچھ عرصہ قبل عمران خان نے ایک مذہبی شخصیت کے طور پر جانے والی بشریٰ مانیکا سے شادی کر لی تھی۔ جہاں جمائما خان عمران خان کی کھل کر حمایت کرتی ہیں، وہیں ریحام خان پاکستان تحریک انصاف کے سربراہ کی بہت بڑی ناقد ہیں۔ انتخابات سے کچھ روز قبل ہی انہوں نے اپنی خودنوشت میں عمران خان کے ساتھ اپنی شادی کی بابت کئی متنازعہ باتیں لکھیں تھیں۔ اس کتاب میں انہوں نے عمران خان پر نشہ کرنے سمیت ان کے کرادر پر سنگین الزامات عائد کیے تھے۔

دوسری طرف عمران خان نے اکثریت حاصل کرنے کے بعد اپنی تقریر کی ہے ، انھوں نے اپنی تقریر مختلف سیاسی جماعتوں کی جانب سے انتخابات میں دھاندلی کے الزامات کے حوالے سے بات کرتے ہوئے کہا کہ کسی حلقے میں آپ کہتے ہیں کہ دھاندلی ہوئی ہے تو ہم آپ کی پوری مدد کریں گے اور جس حلقے کو کہیں گے اس کو کھولیں گے۔

عمران خان نے کہا کہ ’ ہماری طرف سے جو حلقہ آپ کہتے ہیں جو آپ کہیں کہ دھاندلی ہوئی ہے تو ہم آپ کے ساتھ تحقیقات کرنے کے لیے تیار ہیں۔ میں سمجھتا ہوں کہ یہ پاکستان کی تاریخ کا سب سے صاف اور شفاف الیکشن ہوا ہے اور جو بھی اپوزیشن کے دھاندلی کے حوالے سے خدشات ہیں ہم ان کے ساتھ مل کر تحقیقات کرنے کے لیے تیار ہیں‘۔

DW/BBC

One Comment

  1. نجم الثاقب کاشغری says:

    امید ہے کہ وزیراعظم عمران خان کے بیٹوں کی والدہ ہونے کے ناطے جمائمہ خان اور ان کے بھائی زیک گولڈ سمتھ عالمی سطح پر پاکستان کے لئے مثبت لابنگ بھی کریں گے اور عمران خان کو پاکستان میں انسانی حقوق کی بحالی خصوصآً غیر مسلم اقلیتوں کی حالت زار کی طرف توجہ کرنے کی تلقین کریں گی ۔

Leave a Reply

Your email address will not be published. Required fields are marked *